⭕️ شیخ اوْغلو شاه عباس و زورناچێ قاغاش✍️ یازان: #آیدین_خلفی***🔷 تصویردهکی اثر، یازیچینین اؤز ال ا…
انتشار: 2026/07/28 20:50 UTCدریافت: 2026/08/04 02:32 UTCآخرین مشاهده: 2026/08/04 02:32 UTC
⭕️ شیخ اوْغلو شاه عباس و زورناچێ قاغاش✍️ یازان: #آیدین_خلفی***🔷 تصویردهکی اثر، یازیچینین اؤز ال ایشی و ساخسێدیر.شیخ اوْغلو شاه عباسێن ائوی، چایێـرلی کندینین گیرهجڲینده، یوْلون قێـراغیندا یئرلشیردی.پایێـزین آخێر گۆنلری ایدی؛ آلا قار یاغمێشدی. قار چوْخ اوْلماسا دا، شاختاسێ اؤز سؤزۆنو دئییردی. اوْنا گؤره گۆن اڲیلن کیمی، هامێ ائوه چکیلمیشدی.هاوا بالا – بالا قارالێـردی. بیردن شیخ گیلین قاپێـسی چالێندی! آردێـنجا دا:- «های ائو ییهسی!»دئیه اوجا، آما اؤزۆنهمخصوس بیر سس گلدی.شیخ تلهسیک یوْلا سارێ اوْلان باجانێ آچێب:«کیمسن؟» – دئیه سسلندی.- «آللّه قوْناغێیام» – دئیه اوْرتا یاشلی بیر کیشی، حیط دیوارێنین دالێندان قَنشره چێخیب، اؤزۆنو گؤستردی.شیخ میسرییهسینی چیڲنینه آتێب، قاپێـنی آچماق اوْچون ائیواندان حیطه ائندی.چایێـرلی کندی «یاردێملی» داغلارێنین قوزئی اۆزونده، هامار بیر یئرده، باغلارین ایچینده یئرلشمیشدی. آخێ هر ائوین بؤیۆک حیطینده، قدیمدن قالمێش گؤودهلی بیر قوْز آغاجێ وار ایدی. اوْنا گؤره اوزاقدان باخاندا، کنددن چوْخ باغا اوْخشایێـردی.پیللهنین آیاغێندان حیط قاپێسینا دک، قوْز آغاجێنین خزلی ایله اؤرتۆلموش، اوْتوز مترلیک قێسا مسافهنی شیخ سرعتله گئدیب، قاپێـنی آچدێ و قوْناغێ ایچهری آلدێ.خزلین اۆزرینه قوْنموش یوخا قارێن اۆستونده، باشماق ایزلری دامغا کیمی آچێق – آیدێن گؤرۆنوردو.شیخ قوْناغێ ائوه یئرلشدیریب، سوْنرا قایێدیب، حیطده اوْلان «کوسارا»دان بیر آز اوْدون گتیردی، «پێـچی» قالایێب آلێشدیردی.ائو قێـزیشدیقجا، شیخلا قوْناغێن دا صؤحبتی قێـزیشدی. شیخ دئدی:- قوْناق بویور گؤرک، کیمسن؟ نهچیسن؟ هاردان گلیب، هارا گئدیرسن؟- آدێم «قاغاش»دێر، زورناچێیام. ائله بئله کندلری دوْلاشێرام، جماعتین گؤز یێغینجاقلاریندا زورنا چالێب پای آلێرام. چایێـرلینین شیخنشین اوْلدوغونو بیلیرم، بورا دؤنمک ایستهمیردیم، آما بئواختا قالدێغیم اۆچون سیزه زحمت وئرمڲه مجبور اوْلدوم.شیخ آزاجێق اوجا سسله، تعجّۆبلو شکیلده:- زورناچێ؟! – دئدی.قاغاش بیر آز آلێندی؛ داها دوْغروسو، بیر آز قوْرخدو. اۆرهڲینده:«زورناچێ اوْلدوغوما گؤره شیخ منه مۆتروف دئییب ائودن چێخارسا، گئجهنین بو واختێ، بو قار- شاختانێن ایچینده من هارا گئدهجم؟» - دئیه دۆشوندو.دیلی توتار – توتماز:- هه شیخ، زورنا چالێرام.- ههههه… بس سن بیلمیرسن شریعتده زورنا چالماق گناه سایێلیر؟- یوْخ شیخ، من اوْ صؤحبتلری بیلمیرم. ددهبابادان بیز زورناچێییق. بو زورنا دا منه ددهمدن قالێب.شیخین ایشارهسی ایله، قاغاش زورنانێ پالتوْسونون جیبیندن چێخاریب یئره قوْیدو. شیخین نه دۆشوندوڲونو بیلمهدیڲی اۆچون، بیر آز اۆرهڲی ایله آراشێردی.شیخ، قاغاشا سارێ دؤنۆب:- گؤتۆر پیله، گؤرۆم نئجه چالێرسان! – دئدی.قاغاش چکینه – چکینه زورنانێ گؤتۆروب، آغزێـنا آپاردێ. دوْداقلارێ زورنانێن تاغالاغێ ایله اؤپۆشونجه، گؤزلری یومولدو، زورنا دیله گلدی.بیر آووردو شیشیر، بیری یاتێردی. ائل هاواسێ شیخا خوْش گلدیکجه، شیخ قولاغێنی داها یاخێنا -زورنایا سارێ- آپارێردی.قاغاش بیر ده گؤزۆنو آچدێ و گؤردۆ کی، شیخ قولاغێنی او قدر یاخێنا گتیریب کی، ساققالێ زورنانێن آغزێنا یاپێشیب، اؤزۆ ده زورنانێن هاواسێندا ایتیب.قاغاش زورنانێ دایاندێریب، دئدی:- اوّل بئله دئدین «زورنا چالێرسان!» من قوْرخدوم. ایندی ده ساققالێن زورنانێن ایچینه گیریر!شیخ گۆلومسهییب دئدی:- دانێشما، چال ددهم، قوربان قێریلیریق.«قاغاش»ێن گؤزۆ تاقچادا دورموش بیر هیکله دۆشدو.- بو هیکل نهدیر؟- منیم هیکلیمدیر.- نییه ساققالێـنلا، گؤبڲین عینی شکیلدهدیر؟- بیزیم کندده بیر هیکلتراش وار؛ آدامێن ایچ اۆزونو گؤرۆر، و هر کسدن گؤردۆڲو سیمانێ هیکله چئویریر. منی ده بو شکیلده گؤرۆب.۱۴۰۴/۰۹/۲۹ @SancaqDergisihttps://t.me/Sancaq_media/8311
تاریخچه بازدید مشاهدهشده
حدود 0 بازدید تازه در ساعت در این نمونهپستهای تلگرام — سانجاق SANCAQ
⭕️ آغ چارشاب ✍️ یازان: #آتـنا_عظیمی – اردبیل توکانچێ الین آغ ساققالێنا چکیب، دئییر:- خدمتیندهیم قێـزیم؟گؤزۆمو او ایکی خانێمدان کی، چارشابێـن آراسێندان منه اڲزی – اڲری باخێرلار چکیب، دئییرم:- من اولدوز خانێمین دالێسیجان گزیرم.خانێملار منه تعجّبله باخێرلار. توکان ییهسینین قاشلارێ اۆسته گئدیر. آنێده قاشقاباغێـن سالێب، دئییر:- ایشینی بویور؟ساغ الیمدهکی چارشابێ یوخارێ گتیریب، دئییرم:- بیر امانتی وار منده.غملی بیر گۆلوش اۆزونه قوْناق اوْلور:- اولدوز خانێم، ایکی گۆن اوْنایکی گۆنلوک جنگدن قاباق، قێـزینان نوهسین گؤرمک اۆچون تهرانا سارێ یوْلا دۆشوب، ایلک اوْغلوینان اردبیلدن گئتدیلر. امّا یازێق اوْغلوینان اؤزۆ، بیرجه بالاجا قێـزی، اۆچ یاشێندا نوهسینن شهید اوْلدولار. سن، نهجۆر امانتدارسان کی، بیلمیرسن چارشاب ییهسی چوْخداندێر توْرپاق آلتێندا یاتێب.آچێق آغێزنان حاجێیا باخێرام! دیلیم آچێلمیر کی دییم: «من، تزهلیکده اولدوز خانێمی حرمین حیطینده گؤرۆب، چارشابێ اوْلاردان آلمێشام.» تزهدن سؤزۆنون دالێن توتوب، دئییر:- بئچارا حاجێ خانێم ائلهبیل بیلیردی دای بو ائوه قایێتمایاجاق! ائوین غریب آقایا وقف ائلهییب، اوْندان سوْنرا گئتدی تهرانا... آخێ اولدوز خانێم جوانلێغیندا دا غریب آقامێن خدّامیایدی. ایندی ده قاپێـسی، هامێ آقانێن ایستهینلرینین اۆزونه آچێـقدیر.دای بیلمیرم توکان ییهسی نه دئییر! او دانێشیر، من ده دوْنوخوب، اۆزونه باخێـرام. امّا سسین ائشیتمیرم!سسسیز توکاندان چێخیب، چارشابێ باغێرما باسێب، دیوارا سؤیکهنیرم. گؤزلریمین دامجێ – دامجێ یاشێ یاغێشین دامجێلارینان قارێشیب، چارشابێـن اۆستونه تؤکۆلور.اۆزومو گؤڲـه توتوب، قارا بولودلارا باخێب، اولدوز خانێما فاتحه اوْخویورام. #سون @SancaqDergisihttps://t.me/Sancaq_media/8356
⭕️ آغ چارشاب ✍️ یازان: #آتـنا_عظیمی – اردبیل 🔷 غریب آقانێ یارادان تانرێنین آدیلا گۆنبذین اێشیلتیسی گؤزلریمی اینجیتمیردی، دایجا گؤزلریمی تومارلایێب، منی آقانێن یانێندا شرمنده ائلهییردی. گۆن یئرین آیا وئریب، بولودلارێن دالێندا گیزلهنیردی. ماشێنین یان آیناسێندان یاشلا دوْلموش گؤزلریمه باخێب، اؤزۆمدن سوْروشورام:- من همان قێـزام؟! همان کی، هر ایل بایرامقاباغێ آتاما یالوارێردیم منی مشهده گتیره تا گلم آقانێن محبتلی باغرێندا ایلیمی تزهلهییم؟ ایندی نجۆر اوْلمێشدی کی، آلتێ آیدێر مشهدده یاشایێردیم، امّا حرمه گئتمهمیشدیم!او بالاجا قێـزدان هئچ بیر زاد قالمامێشدی. اوْ قاپقارا ساچلارێمدان الان بیر دسته سارێ رنگده شالێن آلتێندان چێخیب، اؤزۆن جماعته گؤرسهدیردی! دێرناقلاریم آرایشگرین لطفی ایله گۆنده مین رنگ دڲیشیردی!اختیاریم اؤز الیمده دڲیلدی. ماشێندان یئره دۆشوب، قدم – قدم حرمه یاخێنلاشیرام. هر بیر قدم آتدێقجا گؤزیمین قاباغێن یاش توتوردو. بی جۆر کی، آیاقلارێمین قاباغێن زوْرنان گؤریردیم.اؤزۆمه کی گلیرم، چارشاب امانت وئرن خانێمین قاباغێندا دورمێشام. سسیم اسه – اسه دئییرم:- چارشاب ایستهییرم.بیر کلمه دئییر:- کارت ملّی!الیمی جیبیمه سالێب، گزیرم. جیبیمین آستارێ چێخیر بیطرفه، بوْشدو! تزهدن الیمی آتێرام کیفیمین ایچین گزیرم یوْخدو! یانێمدا دڲیل.یالوارێرام:- خانێم! نوْلار بیر دنه منه چارشاب وئر. من قایتاراجاغام، آرخایێن اوْل.باشێن ساغ – سوْلا توْولایێب، دئییر:- وئره بیلمهرم.اوْردان چێخیب، قاپێسینین آغزێندا دیوارا سؤیکهنیب، گؤزلریمی یوموب، سسنن آغلایێب، دئییرم:- من یازێق، الان چارشابێ هاردان تاپێـم؟!الیمی اۆزومه توتوب، دئییرم:- انتـظارێن واریدی آقا، سنی حرمه قوْیا؟باشێمی اللریمین آراسێندا توتوب، اۆرکدن آغلایێـرام. منی دالدان بیری سسلهییر:- قێـزیم؟گؤزلریمی آچێرام. بو خانێم کیم ایدی؟ الی اسه – اسه منه اشاره ائلهییر قاباغا گئدم. اوْ قوْجا خانێمین قاباغێندا دایانێـرام. قێریشمیش اۆزونه باخێب، سلام وئریرم. جوابێمی گۆلر اۆزنن وئریب، دئییر:- آل بو چارشابێ.آغ چارشابێ منه سارێ توتور. اسن سسین کی ائشیدیرم، گؤزلریمی چارشابدان چکیرم.- بو منیم قێـزیمین سوْغاتێدیر. گؤردۆم سنه چارشاب وئرمیرلر! بونو سنه وئریرم، امّا تئز منه قایتارارسان.الیندن اؤپۆب، سؤزۆمو تئز – تئز، تلسه – تلسه دئییرم:- آرخایێن اوْلوز حاجیخانێم! بونو تئزلیکجه سیزه گتیررم.آیاغا دوروب، ائوینین آدرسین آلێب، آدینان – فامیلین سوْروشوب، اڲیلیرم تزهدن الیندن اؤپۆرم کی، گۆلوب باشێمی تومارلایێـر:- گئت قێـزیم اللّه آمانێندا.یوْلون یارێسیندا دؤنۆب، ال توْولایێب، خداحافظی ائلییرم.چارشابێ باشێما آتێـرام. آناسێن ایتیرن بالاجا اوشاق تکین غریبلیک ائلییه – ائلییه، ساغ – سوْلوما باخێب، الیمی سینهمین اۆستونه قوْیوب، دیلیمن آلتێندا دئییرم: «السّلام و علیک یا علی بن موسی الرضا.»گؤزلریمین یاشێ سؤزۆمون دالێسیجان سۆزولوب، بزکلی اۆزومه تؤکۆلور. یانێمدان سوْووشان منه چپ – چپ باخێر. امّا منه اؤنمی یوْخدور.بیر آندا اؤزۆمو جماعتین آخێشیندان خلاص ائلهییب، حرمه کئچیب، یاخێنلاشیرام. قێچلاریمین گۆجو آلێنیب، یئره دَڲیرم. باشێمی حرمه سؤیکهییب، گؤزلریمی یومورام. آیاقلانان ال – آیاغێمین آغرێسین بیلمیرم! اجازه وئریرم گؤزلریمین یاشێ تؤکۆلسون.غم – کدر آغاجێنین کؤلگهسی اۆرهڲیمین باشێندان چکیلیب، آقامێن محبتلی الی باشێما چکیلیر. دوْلو اۆرهڲیمندن، دۆنیانێن ایشلریندن کی، منیم بو بالاجا قلبیمی نهجۆر سێندیرمیشدی آقایا دئییب، حرمدن چێخیرام. گۆلوش اۆزومدن چکیلمیر. اۆرهڲیم ایستهمیر ائویمیزه قایێدیم. امّا گرک امانتی اولدوز خانێما یئتیرم.آقاینان خداحافظی ائلهییب، ایستهییرم کی بیرده منه مهلت وئرسین تا خدمتینه یئتیشیم.طیارهده اوْتورموشام. آغ بولودلارا باخێرام. گینه ده گئدیرم آنا یوردوما، اردبیلیمه...اوچماغا قانادێم یوْخدو! بیرده او مهربان خانێمی گؤرهجکدیم. او بیرده منی یاشایێشا قایتاردێ. نورلو اۆزو منیم اۆرهڲیمده محبتین اکمیشدی. تلهسیردیم اوْنو گؤرمک اۆچون.یاغێش اردبیلین خیابانلارێنا قوْناقایدی. گۆن اۆرهڲی توتولوب یاغێردی. بولودلار دۆننکی یاشلێ گؤزلریمه بنزهییردیلر.خیابان قێراغیندا ماشێندان یئره دۆشوب، نفس آلێرام. یاش توْرپاغێن ایڲسی آغجیڲریمه دوْلور.اۆزومو گؤڲـه سارێ توتورام: «آغلایێن بولودلار! من دۆنن آتامێن باغرێندا، دوْلموش اۆرهڲیمی بوْشالتمێشام.»کۆچهنین باشێنداکی توکانا گیریب، سلام وئریرم. #دوامێ_آشاغێدا... 👇 @SancaqDergisihttps://t.me/Sancaq_media/8356
■ 2812 مین شماره روزنامه سیاسی واجتماعی مهدتمدن در 8 صفحه به زبانهای ترکی و فارسی روز یکشنبه 25 مردادماه 1405🔹فایل pdf صفحات نشریه در لینک کانال تلگرام مهدتمدن⬇️t.me/mtnewspaper%F0%9F%8C%90 www.mtnews.ir🌐 www.asanews.ir☎️ 04135550663📳 09362822918🆔 @asanews
ٰ«#سانجاق»، سیاسی- اجتماعی مهدتمدن گۆندهلیگینین ۲۸۱۲. سایینداکی تۆرکجه صفحه@SancaqDergisi🌐 instagram.com/sancaq2%F0%9F%8C%90 instagram.com/asanews.ir
⭕️ هنری خبر 🔷 خیاو «مشگینشهر» سینماسێنا باشقا بیر افتخار؛ «یَل» آلمان اؤلکهسینه یوْل آلدێ. ✍ حاضرلایان: #شبنم_توحیدی مشگینشهر سینماسێ بیرداها اولوسلار آراسێ ساحهده پارلادێ.«آرمین حجازی»نین یازێـچیلیق و یؤنتمنلیڲی* و «دَرگاه فیلم ایران»ێن یاپێـمچیلیغی ایله حاضرلانان «یَل» قێسا فیلمی، آلمانێن DETMOLD قێسا فیلم فستیوالێنین ۲۲.جی اولوسلار آراسی رسمی بؤلۆمونه سئچیلهرک، بو فستیوالا یوْل تاپدێ.بو فستیوال هر ایل دۆنیانێـن هر یئریندن مستقل فیلم یؤنتمنلرینین، مینلرله اثرلرینه ائو صاحیبلیڲی ائدیر.بو ارزشلی و دڲرلی باشارێ، اثرین دۆنیادا تانێـنماسی یوْلوندا اؤنملی بیر آدێم سایێـلیر و ایرانلێ گنج فیلم یاپێمجیلاری، خصوصیله مشگینشهرین صنعتکارلارێنین گۆج و قابیلیتینی گؤستریر.«یَل» بوندان اؤنجه ده، هندوستانێـن ۱۵.جی CMS International Children's Film Festival فستیوالێـنا قاتێلمیشدی و اولوسلار آراسێ موفقیتلرینی دوام ائتدیریر.بو فیلمین اعتبارلێ اؤلکه دێشی فستیواللارا آردێجیل قاتێـلماسی، یالنێـز اثرین یاپێـم اکیپی اۆچون باشارێ دڲیل، بلکه اردبیل استانێ و مشگینشهر بؤلگهسی سینماسێ اۆچون ده، دڲرلی بیر قازانجدێر؛ بیر شهر کی، آدێـنی بیر داها دۆنیا سینما خریطهسینده یازدێـردی.مشگینشهرلی گنج فیلمساز «آرمین حجازی» اۆچون بو باشارێ، اوْنون دۆنیادا اؤنملی اوْلایلارا ائتگیلی قاتێـلماسینین یئنی بیر فصلینین باشلانغێجی اوْلا بیلر. بو موفقیت ایرانێـن مستقل سینماسێنین اولوسلار آراسێ ساحهده آیدێـن گلهجـڲینه اۆمید وئریر.مدنیت و ارشاد اسلامی ادارهسی و گنج سینما جمعیتی، بو موفقیتی جاوان و چالێشقان صنعتکار «آرمین حجازی» بـڲه، محترم عائیلهسینه، بؤلگه و استان صنعتکارلارێنا تبریک دئییر.اۆمید ائدیریک، بو صنعتکارێن آلمان قێسا فیلم فستیوالێـنداکی پارلایێـشینا دا شاهد اوْلاق.مشگینشهر مدنیت و ارشاد اسلامی ادارهسینین عمومی رابطهسی 🔶 آچێقلاما:یؤنتمن: کارگردان@SancaqDergisihttps://t.me/Sancaq_media/8354
⭕️ کوْراوغلو چنلی بئله گلیر🔷 بو دفعه چنلیبئل تبریزین آچێـق هاواسێندادیر.دورآت و قێـرآت ۱۴۰۵. کوْراوغلوسونون بؤیۆک سورپریزلریدیرلر.اوْنا گؤره...کوْراوغلو تاماشاسێنی قاباقجادان گؤرنلره و گؤرمهینلره بو گؤزل تاماشا توصیه اوْلونور.جمعه گۆنوندن هر آخشام، قێـرآتین کیشنرتیسی، دلیلرین نعرهسی، کوْراوغلونون هئیبتی، عاشێغین سازێنین اینیلتیسی «تبریز» گئجهلرینه قوْناق اوْلاجاق.🔶 بلیط آلماق اۆچون ebilit.com مراجعه ائدین.@SancaqDergisihttps://t.me/Sancaq_media/8352