⭕️ زرنیشان خانێـمین چنلی‌بئله گلمه‌سی ✍️ کؤچۆرن: #شبنم_توحیدی ایکینجی بؤلۆم چنلی‌بئله طرف یؤن آلدێل…

⭕️ زرنیشان خانێـمین چنلی‌بئله گلمه‌سی ✍️ کؤچۆرن: #شبنم_توحیدی ایکینجی بؤلۆم چنلی‌بئله طرف یؤن آلدێلار. آز گئتدیلر، آلچاقلێ، اوجالێ داغلار آشدێلار، بیر نئچه گۆندن سوْنرا اوْنلار «یاغێ» قوْروغونا چاتاندا گۆن بیر سیجیم بوْیو قالخمێشدی. دلی‌لر مؤمینه خانێمین پئشوازێـنا، یاغێ قوْروغوندا دوردولار. چنلی‌بئله چاتاندا مؤمینه خانێم گؤزلرینه اینانمادێ. هر یئرده دلی‌لر، خانێملار، قایێـر – قایێـر قایناشێردی. مؤمینه خانێمی هره بیر جۆر تصوّر ائدیردی. مؤمینه خانێم آتـدان ائنن‌ده قدّی – قامتی، بوْیو، مغرور یئریشی ائله بیل چنلی‌بئله یئنی بیر زینت وئردی. چنلی‌بئل خانێملاری، مؤمینه خانێمین گؤزللیڲیندن خجالت تَـری تؤکدۆلر. جمعی دلی‌لرین آناسێ، نیگار خانێم بئله، مؤمینه خانێمین گؤزللیڲیندن پوْزولدو. آلا گؤزلری اختیارسێز پیالا کیمی دوْلدو. نیگار خانێمین یاز بولودو کیمی دوْلدوغونو گؤرن کوْراوغلو، تئللی سازێن باغرێـنا باسێب، آلدێ گؤرک نه دئدی: گَـل سنه سؤیله­‌ییم، آی حؤکمدار قێـزی،آغلاما نیگارێـم، او دا یارێـمدی.دئدیڲین سؤزلرین چێخدیمی یاددان؟آغلاما نیگارێـم، او دا یارێـمدی. ایره­‌لی گـل توت الینله الینی،بۆلبول اوْلان آختارمازمێ گۆلونو؟مندن اؤترۆ ترک ائیله‌دی ائلینی،آغلاما نیگارێـم، او دا یارێـمدی. یاخشێ باخ سن، کوْراوغلونون ذاتێـنا،قێـلینج قالخانێـنا، پوْلاد قاتێـنا،بیر ائیواز عشقینه، حسن خاطێرینا،آغلاما نیگارێـم، او دا یارێـمدی. سؤز تماما یئتیشدی. نیگار خانێم ایره­‌لی یئریدی. مؤمینه خانێما خوْش‌ گلدین دئییب، مجلیسده کوْراوغلونون سوْل طرفینده اڲلشدیردی. مؤمینه خانێمین گلیشی شرفینه چنلی‌بئلده بیر کئف مجلیسی دۆزلدی کی، ایندییه قدر دۆزلن مجلیسلرین شاهێ سایێلدی. دلی‌لر گئجه‌دن خیلی کئچنه‌دک یئدیلر، ایچدیلر، کئفلر دورولدو، داماقلار چاغ اوْلدو. دئییرلر، بئله شن – شوخ مجلیسلردن سوْنرا کوْراوغلو هئچکسین جرأت ائدیب، قاپێـسینی آچمادێغی قێـرخینجی اوْتاغا گئدرمیش. بیر ساعات اوْردا تک – تنها اوْتوردوقدان سوْنرا چێخارمیش. بو دفعه ده کوْراوغلو همین اوْتاغا گیردی. بیر ساعاتدان سوْنرا اوْتاقدان چێخاندا، حسن گؤردۆ کی، کوْراوغلو ائله حالدادێ، ائله حالدادێ پێچاق وورسان قانێ چێخماز! گؤزلر قان چاناغێ کیمی قێپ­قیرمیزی! حسن چوْخ گؤتۆر – قوْی ائتدی، هئچ نه باشا دۆشمه­‌دی! اوْ گۆندن سوْنرا حسن آتاسێنی گؤزدن قوْیمادێ. گؤردۆ کی، آتاسێ سوْن گۆنلرده همین اوْتاغا تئز – تئز گئدیر. هر دفعه ده پژمرده حالدا، گؤزلری نملی اوْتاقدان چێخیر! کوْراوغلو بیر دفعه ده اوْتاغا گیرنده، حسن ده آستاجا اوْنون آرخاسێنجا ایچری گیردی. حسن باخدێ کی، آتاسێ بالاجا بیر صاندێقچا آچدێ، اوْرادان بیر قێـز عکسی چێخارتدی، بیر ساعات اۆزونه تاماشا ائتدی، سوْنرا عکسی یئنی­دن یئرینه قوْیماق ایسته­‌دیکده، حسن آتاسێ‌نین بیله‌ڲیندن یاپێشدی. حسن آتاسێ‌نین الینده­‌کی قێـزین عکسینه باخدێ. قێـز نه قێـز، آی پارچاسێ! ائله بیل کی، آللّه ‌تعالیٰ خوْش گۆنونده، خوْش ساعاتێندا، خوْش دقیقه­‌سینده قلمی­نی بو قێـزین اۆزونه چکیب. بیر باخان دئییر، قوْی بیر ده باخێم. حسن‌ێن کؤهنه یاراسێ فوران ائله‌دی. یادێـنا «احمد خان»ێن قێـزی، «مهری خانێم» دۆشدو. آخێ، مهری ده بیر قێـز ایدی، گؤزللیکده بۆتون حوری‌لر اوْنون سایێـندا دوراردێ. مهری‌نین قدّی – قامتی، بوْیو – بوخونو، دورنا کیمی جان آلان آلا گؤزلری، آلما کیمی قێـرمیزی یاناقلارێ، یۆز مین عشوه ایله یئریشی، جیران کیمی مغرور دوروشو گؤزلری اؤنۆنده جانلاندێ. مهری خانێمین، حسن­له آیرێلیغیندان سوْنرا چوْخ خفت چکمه­‌سی، حسن‌ێن آتاسێندان اجازه آلێب، «احمد خان»­ێن یانێـنا قایێـدارکن، قاپێـدان قالخان جنازه‌نی گؤرمه‌سی، حسن‌ێن یاخا یێـرتیب، اۆز جێرماسی، آغ گۆنونون گؤی اَسکییه دؤنۆشمه­‌سی اۆره­‌ڲی‌نین باشێنی یاندێردی. اۆره‌ڲی کؤوره‌لدی. گؤزلری یاز بولودو کیمی دوْلدو. آتاسێ‌نین حالێنا آجێدی. دئدی: - مهربان آتا! سؤیله، بو کیمدی؟ نه اۆچون هر دفعه بو اوْتاغا گیریب، او قێـزین عکسینه باخدێـقدان سوْنرا آغلایێرسان؟ مگر من اؤلمۆشم کی، قوْچ کوْراوغلو خفت چکسین؟ یا بو سرّی منه آچمالێسان، یادا آنامێ دا گؤتۆروب، بو ساعات چنلی‌بئلی ترک ائده‌جـڲم. #آردێ_گلن_سایێدا... @SancaqDergisihttps://t.me/Sancaq_media/8331